བཅོམ་ལྡན་རྒྱལ་བ་འཆི་མེད་ཚེ་ཡི་ལྷ།།
འཇིགས་ཀུན་ལས་སྒྲོལ་ཡིད་བཞིན་འཁོར་ལོ་དང་།།
སྣང་སྲིད་ཟིལ་གནོན་དཔའ་བོ་ཆེན་པོ་སོགས།།
དེང་འདིར་སྨོན་ལམ་འགྲུབ་པའི་དཔང་པོར་གཤེགས།།
མཐའ་བྲལ་ཆོས་དབྱིངས་ཁྱབ་བརྡལ་ནམ་མཁའ་ཡི་ཀློང་ལས།།
ངེས་པ་ལྔ་ལྡན་དགའ་བའི་སྟོན་མོ་ལ་རོལ་བཞིན།།
སྣ་ཚོགས་ཅིར་ཡང་རོལ་བ་འགྲོ་འདུལ་གྱི་དབང་ཕྱུག །
སྐུ་གསུམ་ཀུན་འདུས་འཇིགས་མེད་གླིང་པ་ཉིད་མཁྱེན་ནོ།།
ལྷར་བཅས་འགྲོ་བའི་འདྲེན་པ་ཤཱཀྱའི་གཙོ།།
སྣང་སྲིད་ཟིལ་གནོན་དཔལ་ལྡན་མཚོ་སྐྱེས་རྗེ།།
གདོད་མའི་མགོན་པོ་དྲི་མེད་འོད་ཟེར་སོགས།།
རྩ་བརྒྱུད་བླ་མའི་ཞབས་ལ་གུས་ཕྱག་འཚལ།།
འཛམ་གླིང་ས་ཡི་ཡང་རྩེ་གངས་ལྗོངས་སུ།།
ལུས་ཀྱི་ལྟེ་ཁྲག་དམར་པོ་དོར་ན་ཡང་།།
ལས་རླུང་དྲག་པོས་རྒྱང་རིང་ལ་དེད་ནས།།
གཞན་གྱི་ཡུལ་དུ་མི་ཚེ་བསྐྱལ་དགོས་བྱུང་།།
ཆོས་ཉིད་འདུས་མ་བྱས་པའི་ནམ་མཁའ་རུ།།
རྟོག་ཚོགས་སྤྲིན་གྱི་ཡོལ་བས་མ་སྒྲིབ་པར།།
འོད་གསལ་ཡེ་ཤེས་སྣང་བ་འབུམ་སྤྲོ་བ།།
རྒྱལ་ཡུམ་བཅོམ་ལྡན་འདས་མར་གསོལ་བ་འདེབས།།
མཚན་དཔེའི་རྒྱན་གྱིས་སྤྲས་པའི་གང་སྐུ་གསེར་གྱི་ལྷུན་པོས་འཇིག་རྟེན་མཛེས་པར་བྱས།།
དྲུག་ཅུའི་ཡན་ལག་རྫོགས་པའི་ཚངས་དབྱངས་འགག་པ་མེད་པར་སྲིད་པའི་ཁོངས་ན་སྙན།།
གང་ཐུགས་རྡུལ་དང་བྲལ་བར་ཟབ་ཅིང་རྒྱ་ཆེའི་དོན་ཀུན་མ་ལུས་འགོག་མེད་བཀྲ།
བདག་གི་བླ་མ་བཅོམ་ལྡན་ཤཱཀྱའི་རྒྱལ་པོ་ལྷར་བཅས་འགྲོ་བའི་དཔལ་དུ་བརྗིད།།
རབ་འབྱམས་རྒྱལ་བའི་གསང་བ་གསུམ་གྱི་མཛོད།།
སྤྲུལ་པའི་གར་དུ་རོལ་པའི་དགའ་སྟོན་གྱིས།།
ཞིང་འདིར་ཆོས་ཀྱི་སྣང་བ་སྤྲོ་མཛད་པ།།
བདག་གི་བླ་མ་མཚོ་སྐྱེས་དབང་པོར་བསྔགས།།
སྨྲ་བརྗོད་ལས་འདས་སྤྲོས་པ་བྲལ་བའི་དོན།།
རྣམ་ཐར་གསུམ་ལྡན་ཆོས་ཉིད་མངོན་གྱུར་པ།།
རབ་འབྱམས་རྒྱལ་བ་རྒྱ་མཚོ་བསྐྱེད་པའི་ཡུམ།།
ཤེས་རབ་ཕ་རོལ་ཕྱིན་མར་གསོལ་བ་འདེབས།།
རང་སྣང་རྣམ་དག་གྲུ་འཛིན་ཕོ་བྲང་ནས།།
རབ་མཛེས་ཏཱཾ་ཡིག་འོད་ལས་བཞད་པའི་ལྷ།།
རྒྱལ་བ་ཀུན་ཡུམ་རྗེ་བཙུན་སྒྲོལ་མ་ལ།།
ཇི་སྲིད་བྱང་ཆུབ་བར་དུ་བདག་སྐྱབས་མཆི།།
ཆོས་སྐུ་ཡུམ་ཆེན་རྒྱལ་བ་ཀུན་བཟང་མོའི།།
རང་མདངས་མཚན་དཔེའི་སྒྱུ་འཕྲུལ་མཛེས་སྡུག་ཅན།།
ཆགས་བྲལ་ཆགས་པ་ཆེན་པོའི་སྐུར་ཤར་བ།།
དབྱིངས་ཀྱི་གཙོ་མོ་རྡོ་རྗེ་རྣལ་འབྱོར་མ།།