དོན་དམ་ཟག་བྲལ་ཀློང་ན་བཞེངས་བཞུད་སོགས་ཀྱི་མིང་ཙམ་མི་མངའ་ཡང་།།
གཉིས་འཛིན་གཟུགས་སུ་ཤར་བའི་ཕ་རོལ་རུ་ཏྲའི་དཔུང་ངན་འཇོམས་སླད་དུ།།
རིས་སུ་མ་ཆད་ཀུན་ཁྱབ་སྙིང་རྗེས་འཇིགས་རུང་དཔའ་བོའི་སྐུར་བཞེངས་པ།།
དཀྱིལ་འཁོར་དབང་ཕྱུག་དཔལ་ཆེན་རྡོ་རྗེ་གཞོན་ནུ་བདག་ལ་དགྱེས་པར་གཟིགས།།
ཆོས་ཀུན་གདོད་ནས་དག་ཕྱིར་སྒྲོལ་བྱ་སྒྲོལ་བྱེད་དངོས་སུ་མ་གྲུབ་ཀྱང་།།
ཀུན་རྫོབ་འཁྲུལ་སྣང་མ་ཟད་བར་དུ་བདུད་འདུལ་ཧེ་རུ་ཀར་ཆས་ཏེ།།
བསྐལ་མེ་ལས་ཀྱང་མི་བཟད་མངོན་སྤྱོད་དྲག་པོས་སྲིད་པ་འདར་བྱས་ནས།།
རྡོ་རྗེ་ཁྲོས་པས་ནག་ཕྱོགས་མ་ལུས་ཀ་དག་ཟང་ཐལ་ཆེན་པོར་མནན།།
འཇིག་རྟེན་འདི་ན་སྟོབས་དང་དཔལ་གྱིས་དྲེགས་པའི་ཚངས་དང་བརྒྱ་བྱིན་སོགས།།
ལྷ་དང་ཀླུ་དབང་དག་ནི་གང་གི་གཟི་དཔལ་མཐོང་བའི་སྐད་ཅིག་མར།།
ཤིན་ཏུ་གདུལ་དཀའི་ཁེངས་པ་རིང་དུ་དོར་ཞིང་ལག་སོར་ཟུང་སྦྱར་ནས།།
དགའ་བའི་སེམས་ཀྱིས་གཙོ་བོའི་ཞབས་ཀྱི་པད་མོ་སྤྱི་བོའི་རྒྱན་དུ་བཏེགས།།
མཐའ་དང་བྲལ་ཞིང་ཀུན་ལ་འབྱམས་པའི་ཆོས་ཉིད་ཟག་པ་མེད་པའི་མཁར།།
ཐབས་ཤེས་གཤོག་ཟུང་བསྒྱུར་ནས་ཐོགས་མེད་ཅི་དགར་སྤྱོད་པའི་རྫུ་འཕྲུལ་ཅན།།
ཁྲག་འཐུང་འབུམ་གྱི་གཙུག་ན་འཁོར་ལོས་སྒྱུར་རྒྱལ་ཁྲི་ལ་འགྱིངས་པ་ལྟར།།
རིགས་ཀྱི་བདག་པོར་བཞུགས་མཛད་མ་ལུས་རྒྱལ་བའི་སྤྱི་གཟུགས་ཀཱི་ལ་ཡ།།
ཡེ་ཤེས་བསྲེག་ཟས་ཐ་མལ་སྣང་བ་ཕྱི་ཡི་འཇིག་རྟེན་རྨང་མེད་གཞིལ།།
ཚད་མེད་ཐུགས་རྗེ་ཆེན་པོའི་བདུད་རྩིའི་ཀླུང་གིས་འགྲོ་བའི་འཁྲུལ་བ་སྦྱངས།།
སྲིད་དང་ཞི་བའི་བརྟན་གཡོ་མཆིས་སོ་ཅོག་ནི་བདེ་ཆེན་འཁོར་ལོར་བསྒྱུར།།
ཨེ་མ་དཔའ་བོའི་ཞིང་ན་ཐམས་ཅད་ལྷ་ཡི་རོལ་པ་ལས་མི་འདའ།།
གང་གི་མཚན་ཙམ་ཐོས་པས་ནག་པོ་བདུད་ཀྱི་སྡེ་དག་བྲེད་གྱུར་ནས།།
སྟོང་ཁམས་ཀུན་ཏུ་གདོང་ལྔས་བདས་པའི་གཅན་གཟན་ཁྱུ་ཚོགས་བཞིན་ཉུལ་ཡང་།།
དམིགས་མེད་རྡོ་རྗེའི་ཏིང་ངེ་འཛིན་གྱི་ཐོག་ལྕེ་མེ་ལྟར་འབར་བ་ཡིས།།
རྣམ་ཐར་གསུམ་ལྡན་ཧོམ་ཁུང་གསེབ་ན་དེ་དག་མིང་ཙམ་མེད་པར་བསྲེགས།།
ཡུན་རིང་སྐྱེ་རྒུ་རྣམས་ཀྱི་སྙིང་ལ་ཉལ་ཞིང་སེམས་རྒྱུད་བསླུས་པ་ལས།།
གཏན་བདེ་མཆོག་གི་བདེ་བ་མངོན་དུ་འཕྲོག་པའི་ཆོམ་རྐུན་བཞིན་བརྒྱུགས་ཏེ།།
ཐར་བའི་སྲོག་རྩ་གཅོད་པའི་ཆོ་གར་རོལ་པའི་བདག་ལྟའི་གཤེད་མ་དག །
དབང་ཆེན་ཁྱོད་ཀྱིས་གད་རྒྱངས་བསྒྲགས་པ་ཙམ་གྱིས་སྐྱེ་མེད་དབྱིངས་སུ་ཞིག །
སྔོན་ཚེ་འཕགས་པའི་ཡུལ་དང་གངས་རིའི་ལྗོངས་ཀྱི་ལས་ལྡན་ཕོ་མོ་ཡིས།།
ཁྱོད་ནི་སྙིང་ལ་མཛའ་བའི་མགོན་དུ་བསྙེན་པའི་དམ་ཚིག་མ་དོར་བར།།
ངོམས་པ་མེད་པར་གསང་ཆེན་རིམ་པ་གཉིས་ཀྱི་བདུད་རྩི་ལོངས་སྤྱད་པས།།
ནང་གི་སྒྲིབ་ཚོགས་ནད་ལས་གྲོལ་ཏེ་ཡ་མཚན་གྲུབ་པའི་གཟིགས་མོ་བསྒྱུར།།
གཟུང་འཛིན་རྟོག་པའི་རྡུལ་གྱིས་མ་གོས་ཆོས་དབྱིངས་ཡེ་ཤེས་འགག་པ་མེད་པའི་རྩལ།།
སྡང་བ་མེད་བཞིན་རབ་ཏུ་ཁྲོས་པ་མཐིང་མདོག་ནམ་མཁའི་སྐུ་ངོམ་བཞིན།།
སྣ་ཚོགས་སྤྲུལ་པའི་དཔུང་གིས་ཕྱོགས་ཀྱི་སྟོང་ཁམས་མཐའ་དག་ཁྱབ་བྱས་ནས།།
ཐར་བར་འཚེ་བའི་བདུད་ཀྱི་སྙིང་ལ་ཆགས་བྲལ་ནད་ཀྱིས་ཟུག་རྔུ་སྟེར།།
རང་བྱུང་གཉུག་མའི་རིག་པ་ཆོས་སྐུའི་མགོན་པོ་ཡབ་ཆེན་ཀུན་ཏུ་བཟང་།།
ཁྲོ་བོའི་གར་ལ་རོལ་བའི་དཔའ་བོ་ཆོས་ཉིད་དོན་གྱི་ཕུར་པ་ཆེ།།
འདུས་མ་བྱས་པའི་ཀློང་དུ་བཞེངས་བཞུད་སྤྲོས་པའི་མཐའ་དང་བྲལ་ན་ཡང་།།
ཇི་སྲིད་བར་དུ་རྡོ་རྗེའི་གར་གྱིས་དུག་ལྔའི་དགྲ་དཔུང་དངངས་པར་བྱེད།།
བཅོམ་ལྡན་ཆེ་བའི་ཆེ་མཆོག་དགྲ་འདུལ་ཡོངས་ཀྱི་རྗེ་བོས་བརྩེར་དགོངས་ནས།།
བདག་གི་སྙིང་ཁུང་མུན་པའི་གཏིང་ན་གབ་པའི་མ་རིག་འབྱུང་བྱའི་ཁྱུ།།
འཇིགས་བྱེད་ཕྲིན་ལས་བྱེ་བའི་འོད་ཀྱིས་མོག་པོར་བསྒྱུར་པའི་རྒྱལ་རྔ་ཆེ།།
ཕྱོགས་ཀྱི་འཁོར་ལོ་ཀུན་ཏུ་ཆད་པ་མེད་པར་བརྡུང་པའི་དགེ་མཚན་སྟོན།།
སྣང་བའི་གཟུགས་ཀུན་འཆི་བྲལ་དཔའ་བོ་རྡོ་རྗེ་གཞོན་ནུའི་གར་དུ་ཤར།།
བརྟན་དང་གཡོ་བའི་སྒྲ་རྣམས་གྲགས་སྟོང་སྔགས་ཀྱི་རང་བཞིན་ཉིད་དུ་ལྡང་།།
ནང་གི་རྟོག་ཚོགས་འགྱུ་བ་མཆིས་སོ་ཅོག་ནི་གཉིས་མེད་ལྷ་ཡི་ཐུགས།།
མཆོག་གི་ཏིང་འཛིན་ཀློང་ན་སྐུ་དང་ཡེ་ཤེས་རོལ་བའི་དགའ་བདེ་འཆར་བར་སྨོན།།
ཞེས་ལོ་ན་གཞོན་པའི་དུས་སུ་ངེས་པ་དོན་གྱི་རྣལ་འབྱོར་བ་དྲིན་ལྡན་བླ་མ་ཚུལ་ཁྲིམས་རྒྱ་མཚོའི་དྲུང་ནས་གཏེར་ཆེན་རིག་འཛིན་བདུད་འདུལ་རྡོ་རྗེའི་གཏེར་བྱོན་གྱི་རྡོ་རྗེའི་ཕུར་པའི་དབང་ལུང་ཐོབ་ཅིང་། རྒྱུན་ཁྱེར་ཉམས་སུ་ལེན་པའི་སྐལ་བ་ཐོབ་པ་ཅན་བདག་པད་མ་ཆོས་ཉིད་རྡོ་རྗེའམ་ཨ་གནམ་ཐུབ་བསྟན་ཞེས་འབོད་པས་ཟབ་མོ་མཆོག་གི་དངོས་གྲུབ་ཐོབ་པའི་དགེ་རྐྱེན་དུ། ཡི་དམ་གང་ལ་གུས་བསྟོད་བསྟབས་པའོ།།