འཛམ་གླིང་ས་ཡི་ཡང་རྩེ་གངས་ལྗོངས་སུ།།
ལུས་ཀྱི་ལྟེ་ཁྲག་དམར་པོ་དོར་ན་ཡང་།།
ལས་རླུང་དྲག་པོས་རྒྱང་རིང་ལ་དེད་ནས།།
གཞན་གྱི་ཡུལ་དུ་མི་ཚེ་བསྐྱལ་དགོས་བྱུང་།།
གྲངས་མང་རྩ་རྩེའི་ཟིལ་བ་ཡལ་བ་བཞིན།།
སྙིང་ནས་བརྩེ་བའི་གཉེན་ཉེ་གྲོགས་པོ་རྣམས།།
གཅིག་རྗེས་གཉིས་མཐུད་ཕྱི་མར་འགྲོ་བའི་ཚུལ།།
མཐོང་བས་ཚེ་འདི་རྨི་ལམ་ལྟ་བུར་སྣང་།།
རྙེད་དཀའི་དལ་འབྱོར་མི་ལུས་ལྡན་བཞིན་དུ།།
དོན་མེད་བྱ་བའི་ཀློང་དུ་མགོ་འཁོར་མཐར།།
མི་ཚེ་ཕྱེད་ཀ་རྫོགས་པ་འདི་མཐོང་ཚེ།།
རང་མགོ་རང་གིས་གཡོགས་པ་ད་གཟོད་ཤེས།།
ཕྱི་ནང་རིག་གཞུང་མཆིང་བུའི་བང་མཛོད་ལ།།
མི་ལོ་མང་བོར་སྦྱང་བརྩོན་བྱས་དྲགས་པས།།
ནོར་གྱི་སྙིང་བོ་ཆོས་སྐུའི་དགོངས་པ་ཉིད།།
ཡུན་རིང་སྣང་མེད་བཏང་བ་གྱོང་རེ་ཆེ།།
རང་ལོ་ལྔ་བཅུའི་ནང་དུ་སླེབས་པ་ན།།
མི་ཚེའི་ནང་དུ་ཅི་བྱས་དཔྱད་སྐབས་སུ།།
ཆོས་དང་འཇིག་རྟེན་བྱ་གཞག་རླབས་པོ་ཆེ།།
གཅིག་ཀྱང་བསྒྲུབས་མ་ནུས་པར་བློ་ཡིད་ཕམ།།
ལུས་གྱི་གོན་པ་ལྟོ་བར་མཁོ་བའི་ཟས།།
དྲོན་པོའི་སྡོད་གནས་ཡིད་མཐུན་གྲོགས་བཟང་རྣམས།།
ཐམས་ཅད་བདག་ལ་འཛོམས་པའི་སྐལ་བ་ནི།།
ལས་སྨོན་རྣམ་པར་དག་པའི་འབྲས་བུར་སྙམ།།
བྱིས་པས་བརྩིགས་པའི་བྱེ་མའི་མཁར་འདྲ་བའི།།
བདག་ཏུ་བཟུང་བའི་ཟང་ཟིང་ཅུང་མཆིས་པ།།
རྟག་པ་མེད་པའི་རང་བཞིན་ལ་འཇིགས་ནས།།
རང་སེམས་དལ་དུ་མེད་པ་རྒོད་རེ་བྲོ།།
ཤར་དང་ནུབ་ཀྱི་ཡུལ་ཁམས་གྲངས་མང་བོར།།
ཡུན་རིང་འགྲུལ་བས་ཟས་རིགས་སྣ་ཚོགས་དང་།།
འདྲ་མིན་ལྟད་མོར་རོལ་བས་ཐང་ཆད་པས།།
ད་ནི་རི་བོའི་སུལ་དུ་ཡིབ་འདོད་འཆར།།
ལོ་གཞོན་དུས་སུ་འཇིག་རྟེན་དཔལ་ཡོན་ལ།།
ཤིན་ཏུ་སྲེད་པས་ནང་དུ་རབ་གཟིར་བས།།
རེ་དོགས་སེམས་ཀྱི་འདམ་དུ་ལྷུང་བ་ང་།།
དེང་སང་གུ་ཡངས་བློ་བདེར་འཚོ་ལ་རེངས།།
ཁ་སང་ངེས་འབྱུང་སྤུ་ཙམ་སྐྱེས་པའི་དུས།།
ཐམས་ཅད་བློས་གཏོང་ནུས་པའི་ཉམས་ཤར་རུང་།།
དེ་རིང་མི་རྟག་འཆི་བ་མ་དྲན་ནས།།
བྱ་བ་བརྒྱ་ཕྲག་རྩོམ་པའི་རྣམ་རྟོག་ལྡང་།།
སྙན་གྲགས་སྐམ་པོ་ཆེད་དུ་མ་གཉེར་བར།།
རང་གིས་འབད་པས་བརྩམས་པའི་གཞུང་ལུགས་དག།
སྐྱེ་བོ་འགའ་ལ་ཕན་པའི་རྒྱུར་མཐོང་བས།།
ས་སྟེང་འདི་ན་ལག་རྗེས་ཆུང་ངུ་བཞག།
གཞན་ལ་གནོད་པའི་བསམ་པ་མ་འཆང་བར།།
རྟག་ཏུ་ཕན་པ་ཅི་ནུས་བསྒྲུབས་ཡོད་པས།།
ནམ་ཞིག་མལ་སར་འཆི་བའི་དུས་བྱུང་ཚེ།།
འགྱོད་མེད་སྤྲོ་ལྷོད་ངང་དུ་ཆས་འགྲོ་ངེས།།
གཏི་མུག་བཙོན་ཁང་འདྲ་བའི་མི་ཡུལ་འདིར།།
ཕལ་མོ་ཆེ་དག་གཞན་རྗེས་འབྲང་བ་ལས།།
བདེན་རྫུན་དབྱེ་བ་འབྱེད་ལ་མི་མཁས་པས།
དྲང་གཏམ་སྨྲ་ས་དཀོན་པར་ཡིད་སྐྱོ་བྱུང་།།
རྟེན་འབྲེལ་ཕུན་སུམ་ཚོགས་པའི་འབྲས་བུ་རུ།།
གཞུང་དྲང་ཁོག་བཟང་བློ་གྲོས་ལྡན་པ་ཡི།།
ཡ་རབས་ཆོས་ཀྱི་གྲོགས་པོས་བསྐོར་བ་བདག།
དེ་འདྲ་བསམ་གྱིན་སྙིང་ཁུང་གཏིང་ནས་སྤྲོ།།
སྐད་རིགས་ཆ་ལུགས་མི་མཐུན་གཞན་ཡུལ་ན།།
གཞོན་ནུའི་ལང་ཚོ་རིམ་གྱིས་འགྲིབ་བཞིན་དུ།།
ལུས་ཀྱི་ཟུངས་ཉམས་མགོ་བོའི་སྐྲ་དཀར་ཚེ།།
རང་ཡུལ་དྲན་པའི་མིག་ཆུ་ཇེ་མང་ཐལ།།
འཛམ་གླིང་ཡངས་པའི་ཐ་གྲུ་མང་བོའི་ཁྲོད།།
བསོད་ནམས་འབུམ་ལྡན་ཆོས་ཀྱི་རྒྱལ་ཁམས་ཆེ།།
བྷོ་ཊའི་ལྗོངས་ཞེས་གྲགས་པའི་ཞིང་ཁམས་སུ།།
མི་ལུས་བླངས་པ་ཡ་མཚན་ཆེ་འདུག་སྙམ།།
བདག་ལ་བཅོས་མིན་བྱམས་དང་བརྩེ་བའི་སྒོས།།
གོས་ཀྱི་རྩེ་དང་ཟས་ཀྱི་ཕུད་གནང་ནས།།
དཀའ་བ་འབུམ་གྱིས་གཅེས་པར་བསྐྱངས་མཁན་ཚོར།།
དྲིན་ལན་མཇལ་ཡོད་སྙམ་པའི་གདེངས་ཤིག་ཡོད།།
ཐེག་པའི་ཡང་རྩེ་འོད་གསལ་རྫོགས་པ་ཆེ།།
རི་རབ་བཞིན་དུ་དཔང་མཐོ་རྒྱ་ཆེ་བ།།
ཀུན་མཁྱེན་བླ་མའི་གཞུང་གི་བཀའ་དྲིན་ལས།།
ཟུར་ཙམ་མཐོང་བས་ཚེ་འདི་དོན་ལྡན་གྱུར།།
སྐབས་རེར་ཚེ་འདིར་དགོས་པའི་གྲགས་པ་དང་།།
སྟོབས་དང་ལོངས་སྤྱོད་ཅི་ཡང་མ་འཛོམས་པར།།
གྲང་རླུང་འགོག་པའི་སྤྱིལ་བུ་ཧྲུལ་བོའི་ནང་།།
ཇ་རྩམ་བྱུང་ན་དེ་ཡིས་ཆོག་སྙམ་སྐྱེས།།
ས་ཆེན་གཤེགས་པའི་སྐྱེས་བུ་དུ་མ་ཡི།།
ཞལ་མཇལ་གསུང་ཐོས་སྐལ་བ་ཐོབ་པའི་མཐུས།།
ཚེ་འདིར་བཟང་ངན་རྐྱེན་སྣང་ཅི་ཤར་ཡང་།།
མི་བསླུའི་སྐྱབས་ཤིག་སེམས་ཀྱི་གཏིང་ནས་རྙེད།།
གློ་བུར་རྐྱེན་ངན་བར་ཆད་འཕྲད་པའི་ཚེ།།
སྡར་མ་བཞིན་དུ་རྒྱང་བྲོས་མི་བྱེད་པར།།
ཆོས་ཉིད་ལྟ་བས་ཐོག་བརྫི་བྱེད་པ་ཡི།།
ཟབ་མོའི་གདམས་ངག་རྙེད་པས་སྐྱིད་པ་ལ།།
རང་སེམས་དྭངས་གསལ་རྒྱ་མཚོ་ཆེན་པོའི་ངོགས།།
སྣ་ཚོགས་རྣམ་རྟོག་རླབས་ཕྲེང་འགྱུ་བ་ལས།།
སྐབས་འགར་དགའ་འམ་སྐྱོ་བ་མྱོང་བ་དག།
ཤར་མར་ཡི་གེའི་གཟུགས་སུ་བཀོད་པ་ལགས།།
ཞེས་ས་མཐར་འཁྱམས་པའི་ལྡོམ་བུ་པ་ཨ་གནམ་ཐུབ་བསྟན་དུ་འབོད་པས། རང་གི་མི་ཚེའི་ནང་དུ་དགའ་སྡུག་ཟུང་གི་ཚོར་སྣང་བྱུང་བ་རྣམས་ཤོ་ལོར་ཀར་བསྟར་བའོ།།