གངས་ལྗོངས་ཆོས་ཀྱི་དཔའ་བོ་བཞད་པ་ཡི་རྡོ་རྗེ།།
དྲི་མེད་འོད་ཟེར་རྒྱལ་བ་ཀུན་འདུས་ཀྱི་སྤྱི་གཟུགས།།
མཁྱེན་བརྩེའི་འོད་ཟེར་ལ་སོགས་སར་བཞུགས་ཀྱི་དཔའ་བོ།།
སྔོན་བྱོན་གོང་མའི་རླབས་ཆེན་རྣམ་ཐར་ལ་སྙེག་རན།།
སྐྱེ་བོ་ཐམས་ཅད་འཇིག་རྟེན་འབྱོར་བ་ལ་སྲེད་ཅིང་།།
སྙིང་བོའི་ལྷ་ཆོས་བྱེད་མཁན་ཉིན་སྐར་ལས་ཉུང་བ།།
ཉོན་མོངས་དུག་ལྔའི་མུན་ནག་ཇེ་འཐུག་ཏུ་འགྲོ་བའི།།
ད་ལྟའི་དུས་འདི་བསམ་གྱིན་དབང་མེད་དུ་སྐྱོ་བྱུང་།།
སྐད་ཅིག་སྡོད་ལོང་མེད་པའི་དེང་དུས་ཀྱི་འཚོ་བ།།
དོན་མེད་འཚུབ་ཆ་ཆེ་བའི་མི་ཚོགས་ཀྱི་ཡོ་ལང་།།
དགོས་མཁོ་ཉུང་བའི་རྣམ་གཡེང་ཁོ་ན་ཡི་ལས་ཀ།
དེ་གསུམ་བྲལ་བའི་དབེན་པའི་རི་ཁྲོད་འདི་སྐྱིད་པ།།
རི་ཡི་འདབས་སུ་མཐིང་མདོག་རྒྱ་མཚོ་ཞིག་འཁྱིལ་ཞིང་།།
བར་དུ་རྔམས་བརྗིད་ལྡན་པའི་ནགས་ཚལ་གྱིས་བརྒྱན་བཞིན།།
རྩེ་མོ་དགུང་ལ་རེག་འདྲའི་ཡ་མཚན་གྱི་གནས་འདིར།།
མི་ཚེ་གང་བོ་བསྐྱལ་འདོད་ཚོར་བ་ཞིག་ཤར་ཐལ།།
རིན་ཐང་ཆེ་བའི་གཟབ་རྒྱས་བཟའ་བཏུང་གི་འདོད་ཡོན།།
སྣ་ཚོགས་ཞིམ་པའི་རོ་ལྡན་ཟས་སྣ་དག་མེད་ཀྱང་།།
ཟ་མ་ངན་ངོན་ཙམ་གྱིས་ལྟོ་བ་དེ་ཚིམས་ཚེ།།
ས་སྟེང་འབྱོར་བ་རང་ལ་ཐོབ་པ་བཞིན་དགའ་འོ།།
མ་མཐོང་ཨེ་འཕྲད་སྙམ་པའི་བརྩེ་དུང་ནི་ཆེ་རུང་།།
འཛོམས་ཚེ་ངན་གཡོ་ཆགས་སྡང་ཁོ་ན་ཡི་སྒོ་མོ།།
མཁོ་དུས་རྒྱང་རིང་ཡོལ་བའི་གཉེན་ཉེ་ཚོ་མེད་པའི།།
ཞི་འཇམ་རི་བོའི་སུལ་ལ་གུ་ཡངས་སུ་གནས་ཆོག།
འབྲུག་སེང་རི་མོས་སྤྲས་པ་བླ་ཆེན་གྱི་བཞུགས་ཁྲི།།
གསེར་གྱི་རྒྱ་ཕིབས་མཐོ་བའི་ལྷ་ཁང་སོགས་མེད་པར།།
བཀྲག་ཡལ་སྤྱིལ་བུའི་ནང་དུ་ཏིང་འཛིན་ལ་གཞོལ་ཚེ།།
ཉམས་སྣང་བདེ་བའི་དགའ་སྟོན་ཚར་རྒྱུ་ཞིག་མི་འདུག།
དགོས་མེད་རྣམ་རྟོག་སྣ་ཚོགས་ལྡང་བྱེད་ཀྱི་འདུ་འཛི།།
ཞེ་སྡང་ཕྲག་དོག་སློང་བའི་ངག་འཁྱལ་གྱི་ཕུང་པོ།།
སྙིང་བོ་བྲལ་བའི་འཇིག་རྟེན་སོ་ཚིས་ཀྱི་བྲེལ་ཟིང་།།
ཐམས་ཅད་རྒྱང་རིང་གཡུགས་ཚེ་དགའ་བ་ལ་སྐྱིད་པ།།
འདྲ་མིན་སྣང་བའི་ལྟད་མོ་བསླུ་བྲིད་ཀྱི་གར་མས།།
ཅོལ་ཆུང་རིག་པ་འདི་ཉིད་ཡང་ཡང་དུ་བསླུས་ཀྱང་།།
བྱ་བ་དགུ་ཕྲུགས་བཏང་ནས་གུ་ཡངས་སུ་གནས་ཚེ།།
རྣམ་རྟོག་གང་ཤར་རྩོལ་མེད་རང་གྲོལ་དུ་ཞི་འགྲོ།
རྒྱལ་བའི་བསྟན་ལ་ཞབས་ཕྱི་ཞུ་མདོག་གི་བླ་གཟུགས།།
གདུལ་བྱ་སྐྱོང་བའི་བསྟན་འཛིན་སྐྱེས་བུ་ཡི་འབག་ཆས།།
དགའ་སྡུག་བྱིས་པ་འདྲ་བའི་སློབ་ཚོགས་རྣམས་བཞག་ནས།།
གཅིག་པུར་རི་ལ་གནས་ན་དོན་ཆེན་ཞིག་འགྲུབ་འདྲ།།
གཡོ་སྒྱུ་ང་རྒྱལ་གནག་སེམས་ཀུན་སློང་དང་བྲལ་ཞིང་།།
གཞན་ལ་འཚེ་བ་མེད་པར་བག་ཡངས་སུ་རྒྱུ་བའི།།
ཞི་དུལ་རི་དྭགས་ཁྱུ་ཡིས་རྩ་ཆུ་ལ་རོལ་བ།།
འདི་ཚོ་མཐོང་ན་མི་ཡི་འཇིག་རྟེན་ལ་སུན་འོང་།།
མཐོང་བའི་མོད་ལ་ལུས་ཀྱི་སྐོམ་གདུང་ཀུན་འཇོམས་པའི།།
དྭངས་གཙང་ཆུ་བོ་བཞུར་བའི་སྒྲ་སྐད་ཀྱི་རོལ་མོ།།
ག་ལེར་བདག་གི་རྣ་བའི་དགའ་སྟོན་དུ་ཐོས་ཚེ།།
ཡིད་ལ་སྔར་མེད་ལྷོད་འཇམ་ཚོར་བ་ཞིག་སྐྱེས་ཐལ།།
མཐོ་རིས་ལྷ་མོ་གཞོན་ནུའི་གར་སྟབས་ཤིག་བསྒྱུར་འདྲའི།།
རྒྱང་རིང་འགྲུལ་བའི་བརྗིད་ཆགས་སྤྲིན་དཀར་གྱི་ཕུང་པོ།།
མཐོན་མཐིང་ནམ་མཁའི་དབྱིངས་སུ་ཕྱོགས་མེད་དུ་ཕེབས་པ།།
མཐོང་བ་ཙམ་གྱིས་རྣམ་རྟོག་དར་ཅིག་རེར་འགགས་སོང་།།
དགེ་མཚན་བྱེ་བའི་ཕོ་ཉ་བསིལ་རླུང་གི་དར་འཇམ།།
སེམས་ཁྲལ་ཁུར་བོས་མནན་པའི་ངོ་གདོང་ལ་ཕོག་ཚེ།།
དོན་མེད་རྟོག་ཚོགས་ཆུ་ཡི་ལྦུ་བ་ཀུན་ཞི་ནས།།
བདེ་སྐྱིད་འཛུམ་པའི་རི་མོ་དབང་མེད་དུ་བཞད་དོ།།
བྱ་སྤྱོད་བྲེལ་བ་དབེན་པའི་རི་སུལ་གྱི་ཁྲོད་ན།།
ཆོས་བརྒྱད་རེ་དོགས་མ་སྤངས་རང་ས་རུ་ཞི་བས།།
ནོར་གྱིས་ཉོ་མི་བཏུབ་པའི་བཅོས་མིན་གྱི་བདེ་བ།།
ཉིན་མཚན་ཀུན་ཏུ་རོལ་བའི་དགའ་སྟོན་དེ་རྨད་ཨང་།།
ཕྱོགས་ལས་རྣམ་པར་རྒྱལ་བའི་ལྷ་དབང་གི་ཕོ་བྲང་།།
མ་བཞེངས་ལྷུན་གྱིས་གྲུབ་འདྲའི་རི་མཐོ་ཡི་རྩེ་ན།།
གཞན་གྱིས་འཕྱ་ལད་བྱེད་པའི་དོགས་པ་ཞིག་མེད་པས།།
གང་ཤར་ཉམས་མགུར་གྱེར་ཚེ་སེམས་པ་དེ་སྐྱིད་དོ།།
མཁའ་ཡི་ཉི་མ་དྲོན་མོ་ནུབ་ཕྱོགས་སུ་བཞུད་ཚེ།།
མཛེས་སྡུག་ལི་ཁྲིས་ཚོན་གྱིས་རི་ཀླུང་ཀུན་བརྒྱན་ནས།།
ཚ་གྲང་འཇམ་པའི་འཁོར་ཡུག་ལྷོད་འཇམ་གྱི་ཀློང་དུ།།
བདེ་ལྡན་ཞིང་དུ་སྐྱེས་པའི་ཉམས་ཚོར་ཞིག་འབྱུང་འགྲོ།
མཚན་མོའི་མཁའ་དབྱིངས་དྲི་མེད་མེ་ལོང་གི་ངོས་ན།།
ལྟ་ན་རབ་སྡུག་དུང་ཟླ་དཀར་པོ་ཡི་ཞལ་རས།།
ཤར་གྱི་རི་བོའི་རྩེ་ནས་དལ་བུ་རུ་བཞད་ཚེ།།
འཇིག་རྟེན་འདི་ཡང་ཇི་འདྲའི་མཛེས་པ་ལ་སྙམ་སོང་།།
སྤྲིན་དཀར་གོས་སུ་མནབས་པའི་རི་བོ་ཡི་ཕྲེང་བ།།
མཐོ་ཞིང་བརྗིད་པའི་ལྷ་ཤིང་དམར་པོ་ཡི་ཚང་ཚིང་།།
ཡིད་འོང་འདབ་ཆགས་རི་དྭགས་སྣ་ཚོགས་ཀྱི་ཞིང་ཁམས།།
ཨེ་མ་ཕུན་སུམ་ཚོགས་པའི་ཡུལ་ལྗོངས་འདི་རྨད་དོ།།
མ་བཅོས་རང་བྱུང་འབྱུང་བའི་ལང་ཚོ་ཡིས་ཕྱུག་ཅིང་།།
དགེ་མཚན་ཀུན་ཚང་དབེན་པའི་རི་ཁྲོད་འདིར་ཕེབས་ན།།
རང་བབས་བསམ་གཏན་ཆེན་པོའི་བདུད་རྩི་ཞིག་འཐུང་བཞིན།།
སྣང་བ་དཔེ་ཆར་ཤར་བའི་རྟེན་འབྲེལ་དེ་ལོས་ཡོད།།
ཅེས་སྙོམས་ལས་པ་ཨ་གནམ་ཐུབ་བསྟན་དུ་འབོད་པས། རྒྱལ་ཁབ་ཆེན་པོ་ཨ་རིའི་ནུབ་ཕྱོགས་ཀྱི་ཡུལ་ལྗོངས་སྦིག་རྒི་སིར་(Big Sur)ཞེས་འཛམ་གླིང་ལ་སྙན་གྲགས་ཤིན་ཏུ་ཆེ་བ། ཞི་བདེ་རྒྱ་མཚོ་དང་། རི་བོ་མཐོ་ཞིང་བརྗིད་པ། ཤིང་སྡོང་དམར་པོའི་ནགས་ཚལ་སྟུག་པོ། སྲོག་ཆགས་སྣ་ཚོགས་བག་ཡངས་རྒྱུ་བ་སོགས་སྣོད་བཅུད་ཀྱི་དགེ་མཚན་ཕུན་སུམ་ཚོགས་པས་བརྒྱན་པའི་ཡུལ་ལྗོངས་ཀྱི་ཆར་གཏོགས་པའི་རི་གསེབ་དབེན་གནས་ཡིད་དུ་འོང་བར་ཉིན་ཁ་ཤས་གུ་ཡངས་བློ་བདེར་བསྡད་པའི་ཚོར་སྣང་ལ་བརྟེན་ནས་བྲིས་པ་དགེའོ།།