སྨྲ་བསམ་བརྗོད་བྲལ་ཀུན་ཁྱབ་ཆོས་ཀྱི་དབྱིངས།།
སྐྱེ་དང་འགག་པའི་དྲྭ་བ་ལས་འགོངས་པ།།
ཇི་བཞིན་མཁྱེན་པའི་བདག་ཉིད་ཤེས་རབ་དངོས།།
རྒྱལ་བ་ཀུན་བསྐྱེད་ཡུམ་ཆེན་ལ་ཕྱག་འཚལ།།
རྒྱལ་བ་ཀུན་དངོས་ཨོ་རྒྱན་ཆོས་ཀྱི་རྗེར།།
མི་ཕྱེད་དད་པའི་སེམས་ཀྱིས་གསོལ་འདེབས་ན།།
སྐད་ཅིག་མ་རུ་སེམས་ཉིད་རྟོགས་དང་ལྷན།།
གདན་ཐོག་འདི་རུ་གྲོལ་བར་བྱིན་གྱིས་རློབས།།
མཁའ་འགྲོའི་གཙོ་མོ་ཡེ་ཤེས་མཚོ་རྒྱལ་མ།།
བདུད་སྡེའི་དཔུང་འཇོམས་རྗེ་བཙུན་ལབ་ཀྱི་སྒྲོན།།
ངེས་དོན་ལེགས་གཟིགས་ཀུན་མཁྱེན་ཀློང་ཆེན་པ།།
གཅོད་ཡུལ་བརྒྱུད་པའི་བླ་མ་རྣམས་ལ་འདུད།།
གདོད་མའི་ངང་ལ་ཅི་ཡང་མ་གྲུབ་པས།།
ཐོབ་བྱའི་མྱང་འདས་སྤངས་བྱའི་འཁོར་བ་ཡི།།
མིང་མེད་པས་ན་ལམ་ཞེས་མ་དམིགས་པས།།
བཅིངས་དང་གྲོལ་བའི་རྣམ་གཞག་ག་ལ་སྲིད།།
འོན་ཀྱང་མ་རིག་པ་ཡི་དབང་གྱུར་ཏེ།།
རང་སྣང་གཞན་དུ་བཟུང་ནས་བདེན་འཛིན་གྱིས།།
རྨི་ལམ་ལྟ་བུའི་འཁོར་བ་གྲུབ་པ་དེ།།
ཆོས་ཉིད་མ་རྟོགས་བར་དུ་རྒྱུན་མི་ཆད།།
མེད་ལ་ཡོད་དང་མི་བདེན་བདེན་པ་དང་།།
གཉིས་སུ་མེད་ལ་གཉིས་སུ་འཛིན་པའི་བློ།།
སྡུག་བསྔལ་རྩ་བར་སོང་བའི་སྟོབས་ཆེན་པོ།།
གཅོད་ཡུལ་བ་ཡིས་བདུད་ཅེས་ཐ་སྙད་བཏགས།།
སྔོན་བྱོན་རྫོགས་པའི་སངས་རྒྱས་གྲངས་མེད་པས།།
ཉོན་མོངས་དུག་གསུམ་འདུལ་བའི་གཉེན་པོ་རུ།།
ཆོས་སྒོ་བརྒྱད་ཁྲི་བཞི་སྟོང་བསྟན་པ་ལ།།
བཟང་ངན་མེད་ཀྱང་མྱུར་བུལ་ཁྱད་པར་ཡོད།།
ལམ་གཞན་སྒོ་ནས་ལོ་བརྒྱར་འགྲུབ་པའི་དོན།།
གཅོད་ཡུལ་བརྟེན་ན་ཞག་གཅིག་གིས་འགྲུབ་ཅེས།།
སྔོན་བྱོན་ཚད་ལྡན་མཁས་པ་རྣམས་གསུངས་པ།།
ཚིག་ཙམ་མ་ཡིན་དངོས་སུ་མྱང་བ་མང་།།
ཕ་རོལ་ཕྱིན་པའི་ལྟ་བ་ཟབ་མོ་དང་།།
གསང་བ་སྔགས་ཀྱི་ཐབས་གཉིས་མཉམ་སྦྱར་བ།།
བདུད་བཞི་རྩད་ནས་གཅོད་པའི་ཆོས་ཀྱི་མཆོག།
ལབ་ཀྱི་སྒྲོན་མའི་ཐུགས་ལས་འཁྲུངས་པ་རྨད།།
གངས་ཅན་ལྗོངས་ཀྱི་གྲུབ་མཐའ་ཐམས་ཕལ་མོ་ཆེས།།
གདམས་པའི་འབྱུང་ཁུངས་མ་ཅིག་ལ་བྱེད་ཅིང་།།
རང་རང་སོ་སོའི་ཐུན་མིན་ལྟ་དགོངས་ལྟར།།
མཐུན་པའི་གཞུང་ཆོག་གྲངས་ལས་འདས་པ་མཛད།།
བཀའ་རྙིང་དགེ་སོགས་ཆོས་བརྒྱུད་ཐ་དད་པའི།།
གཅོད་ཀྱི་ཆོ་ག་ཕྱག་བཞེས་མི་འདྲ་ཡང་།།
ཐམས་ཅད་དགོངས་པ་གཅིག་དང་དབྱངས་གཅིག་གིས།།
བདག་འཛིན་གཅོད་པ་ཆོས་འདིའི་ཡང་སྙིང་བཞེད།།
ཁྱད་པར་རྫོགས་པོ་ཆེན་པོ་གཞིར་བྱས་པས།།
ཨ་ཏིའི་གཅོད་རྣམས་བྱིན་རླབས་རབ་ཆེ་བས།།
ཚུལ་བཞིན་ཉམས་སུ་ལེན་པའི་སྐྱེ་བོ་ཡིས།།
ཚེ་གཅིག་འོད་སྐུར་གྲོལ་བའི་ཆེ་བ་ལྡན།།
སྤྱིར་ན་གཅོད་ལ་ཞུགས་པའི་གང་ཟག་གིས།།
རྟོགས་ལྡན་བླ་མའི་མདུན་ནས་གདམས་ངག་དང་།།
བརྒྱུད་པའི་བྱིན་རླབས་ལེགས་པར་ཐོབ་བྱས་ནས།།
སྔོན་དུ་འགྲོ་བའི་རིམ་པ་སྒྲུབ་པ་གལ།།
དང་པོ་སྟོང་བ་ཉིད་ཀྱི་གནས་ལུགས་ནི།།
ལྟ་བ་ཁ་འབྱམས་ཙམ་དུ་མ་ལུས་པར།།
ཐོས་བསམ་སྒོམ་པས་ལེགས་པར་དཔྱད་པའི་མཐར།།
གོ་བ་རྣལ་མ་སྐྱེ་བ་མེད་མི་རུང་།།
རིག་པ་རྐྱང་འདེད་ཁྲིད་ཚུད་བཞག་ཐབས་དང་།།
ནམ་མཁའ་སྒོ་འབྱེད་སྒོ་ནས་སེམས་ཀྱི་གཤིས།།
གཞི་མེད་རྩ་བྲལ་ཟང་ཐང་ཆེན་པོ་རུ།།
རྟོགས་ཚེ་བདུད་བཞི་གཅོད་ལ་དཀའ་བ་མེད།།
གཅོད་ཡུལ་སྐྱེ་མེད་དོན་དམ་ཆོས་དབྱིངས་སུ།།
བདག་མེད་རྟོགས་པའི་ཤེས་རབ་རལ་གྲི་ཡིས།།
བདུད་བཞིའི་འཆིང་རྒྱ་ཐད་ཀར་གཅོད་པ་ན།།
ད་གཟོད་གཅོད་ཀྱི་མཚན་ཉིད་ཚང་བ་ཡིན།།
ལྟ་ན་སྡུག་དང་མི་སྡུག་གཟུགས་སྣ་ཚོགས།།
ལུས་ཀྱི་རྒྱན་ཆ་ཁང་ཁྱིམ་ལ་སོགས་པ།།
དགའ་དང་མི་དགའ་སྐྱེ་བའི་སྣང་བ་ཀུན།།
ཕྱི་རོལ་ཡུལ་གྱི་ཐོགས་བཅས་བདུད་དུ་བརྩི།།
གློ་བུར་རྒྱུ་རྐྱེན་གཞན་ལ་མ་ལྟོས་པར།།
ནང་གི་རྣམ་རྟོག་རེ་དང་དོགས་པ་དང་།།
འཇིགས་སྐྲག་ཁུ་འཕྲིག་དངོས་སུ་གྲུབ་འདྲ་བ།།
སེམས་ཀྱིས་བཟོས་པའི་ཐོགས་མེད་བདུད་དུ་འདོད།།
གཞན་གྱིས་བཀུར་བས་ཁེངས་དྲེགས་སྐྱེས་པ་འམ།།
ལྷ་ཡི་ལུང་བསྟན་མངོན་ཤེས་ཡོད་སྙམ་སོགས།།
རང་ཉིད་གཞན་ལས་འཕགས་པའི་འདུ་ཤེས་ཀྱིས།།
དེ་ཚོར་འཁྲི་བ་དགའ་བྲོད་བདུད་ཅེས་བྱ།།
སེམས་ཀྱི་ཆོས་ཉིད་ནམ་མཁའ་དག་པ་ལ།།
བདེན་པར་གྲུབ་པའི་ཆོས་ཤིག་མ་གྲུབ་ཀྱང་།།
ང་ཞེས་ཚུར་བཅད་ཁྱོད་ཅེས་གཞན་བཅད་ནས།།
སྡུག་བསྔལ་ལས་ལ་སྤྱོད་པ་སྙེམས་བྱེད་བདུད།།
ཆོས་ཀུན་མཉམ་པ་ཉིད་དུ་རྟོགས་པ་སྟེ།།
འཇིགས་མེད་ལྟ་བའི་གདེངས་དང་ལྡན་པ་ཡིས།།
ཐབས་ཤེས་ཟུང་འཇུག་མཚོན་པས་ཕཊ་ཀྱི་སྒྲས།།
བདེན་འཛིན་འཁྲི་བ་ཀ་དག་ཀློང་དུ་གཅོད།།
བདུད་ཅེས་བྱ་བ་ལོགས་སུ་མ་མཆིས་ཏེ།།
སེམས་ཉིད་སྟོང་བཞིན་མ་འགགས་རྩལ་དེ་ལས།།
བྱུང་བའི་ཆོ་འཕྲུལ་དངོས་པོར་བཟུང་མ་ཐག།
རོལ་བའི་གསེབ་ཏུ་ཚུད་པ་འབའ་ཞིག་ཟད།།
ལྟ་སྒོམ་ལྡན་ཚེ་ཉོན་མོངས་ཡོད་ཚད་ཀུན།།
གདོང་གཏུགས་བྱེད་ན་རྩད་ནས་ཕྱུང་སྲིད་པས།།
གཉན་ས་མི་བདེ་འཇིགས་སུ་རུང་བ་ལ།།
གཅིག་པུར་ཕྱིན་ནས་དེ་དག་ཆེད་དུ་སློངས།།
ཐོག་མར་ཀུན་སློང་རྣམ་དག་ལྡན་པའི་རྗེས།།
སྔ་བར་ཕྱི་གནོན་གསུམ་གྱི་ལག་ལེན་དང་།།
ལྷོངས་དང་ཚར་ཚད་སོགས་ཀྱི་རྣམ་གཞག་ཀུན།།
བརྒྱུད་པའི་བླ་མའི་གཞུང་དང་བསྟུན་པར་བྱ།།
རང་གཞན་རྒྱུད་ཀྱི་ཉོན་མོངས་ཡོད་ཚད་ཀུན།།
ཉལ་བའི་མི་ཞིག་ཡར་ལ་སློང་བ་བཞིན།།
ལྷ་འདྲེའི་གཟུགས་སུ་བསྐྱེད་ནས་འབོད་པ་དང་།།
མདུན་ནས་བཀུག་ནས་ལུས་ཀྱི་སྦྱིན་པ་བྱ།།
རང་རེ་འདོད་ཁམས་གནས་པའི་འགྲོ་བ་མི།།
ད་ལྟའི་གདོས་བཅས་ལུས་ལ་རབ་ཞེན་ཅིང་།།
འདི་ལ་བརྟེན་ནས་དགའ་སྡུག་མང་འབྱུང་བས།།
སྦྱིན་པས་སྒྲིབ་སྦྱངས་ཚོགས་མང་རྫོགས་པར་འགྱུར།།
རང་གི་ལུས་སུ་དབུ་མ་གནས་པའི་ནང་།།
རྣམ་ཤེས་འོད་ཐིག་ཡང་ན་ཁྲོས་མའི་སྐུར།།
བསྒོམས་པ་ཕཊ་ཀྱིས་སྤར་ཅིང་བེམ་པོ་ནི།།
ཟག་མེད་བདུད་རྩིའི་རང་བཞིན་བྱིན་གྱིས་བརླབ།།
མི་མགོའི་སྒྱེད་པུའི་སྟེང་གི་ཀ་པཱ་ལར།།
རང་ལུས་ཞུ་ཞིང་བདུད་རྩིར་འཁྱིལ་བ་ལ།།
མགྲོན་ལྔ་སྤྱན་འདྲེན་ཚོགས་ཞིང་དགྱེས་པ་དང་།།
མར་གྱི་མགྲོན་ཚིམས་ཚོགས་གཉིས་བསགས་པར་བསྒོམ།།
ཐོད་པར་ཤ་ཁྲག་ཁོལ་ལས་རླངས་པ་ཡི།།
སྤྲིན་ཕུང་མང་བྱུང་དེ་དག་རེ་རེའི་སྟེང་།།
ཟས་སམ་གོས་ཆས་ཡང་ན་ཡོ་བྱད་སོགས།།
བསྒོམས་ཤིང་མཆོད་སྦྱིན་བྱེད་ན་ལན་ཆགས་སེལ།།
བདག་འཛིན་གཅོད་པའི་ཐབས་སུ་རང་ལུས་ཀྱི།།
པགས་པའི་སྟེང་དུ་བམ་པོ་གཏུབས་པ་ལ།།
འཇིག་རྟེན་འདས་དང་མ་འདས་ཤ་ཟའི་ཚོགས།།
འགྱེད་ལ་བོས་ནས་ཀུན་གྱིས་ཟ་བར་བསྒོམ།།
རང་ལུས་གན་རྐྱལ་འགྱེལ་བར་རང་གཞན་གྱི།།
སྒྲིབ་པ་ཀུན་འདུས་སོལ་ནག་ལྟར་གྱུར་བར།།
ཕྱོགས་བཞིའི་བགེགས་རིགས་མ་ལུས་མགྲོན་ལྷགས་ནས།།
ཡིད་ཚིམས་ལམ་གྱི་བར་ཆད་སེལ་བར་སྒོམ།།
བཟང་བའི་ལྷ་དང་ངན་པའི་འདྲེ་གདོན་ཀུན།།
དོན་དུ་རྡུལ་ཙམ་གྲུབ་པ་མེེད་བཞིན་དུ།།
ནང་གི་རྣམ་རྟོག་བདེན་པར་བཟུང་བ་ལས།།
རྨི་ལམ་ཇི་བཞིན་ཤར་བ་ཤེས་པར་བྱ།།
ས་ལམ་མཐོན་པོར་མ་སླེབས་བར་དུ་ནི།།
གང་དུ་འགྲོ་འམ་བསྡད་ཀྱང་གཉན་ས་རུ།།
དམིགས་ནས་དྲན་དང་ཤེས་བཞིན་མི་དོར་བར།།
ཆོས་ཉིད་དྲན་པའི་ངང་དུ་གནས་པར་མཛོད།།
མི་མང་འདུས་སར་འགྲན་སེམས་རྒྱལ་འགོང་ཡོད།།
གཅིག་པུར་གནས་ཚེ་བདག་འཛིན་ཤ་ཟ་རྒོད།།
ཕན་ཚུན་ཕྲག་དོག་དམ་སྲི་དབང་རེ་ཆེ།།
རྒྱུ་ནོར་རྔམ་སེམས་ཡི་དྭགས་ཀུན་ལ་འཁོར།།
གྲོང་པ་རྣམས་དང་ལྷན་ཅག་འགྲོག་དུས་སུ།།
གནོད་སེམས་ཐེའུ་རང་དབང་དུ་མི་འགྲོ་ཞིང་།།
ཆོས་པ་ཚོ་དང་མཉམ་དུ་འཛོམ་པའི་ཚེ།།
གྲུབ་མཐའ་ཕྱོགས་རིས་འགོང་པོར་དོགས་ཟོན་གནོང་།།
ཟས་གོས་ལོངས་སྤྱོད་གནས་ཁང་གང་བཟང་ལ།།
རྒྱུན་ཏུ་སྤྱོད་ན་ཆགས་སྲེད་ཀྱིས་བཅིང་པས།།
སྐབས་རེེར་ལུང་སྟོང་བྱེ་ཐང་ནགས་ཚལ་དུ།།
འདོད་ཡོན་ངན་ངོན་བརྟེན་པ་བོགས་འདོན་འགྱུར།།
ན་ཚ་རྐྱེན་ངན་བཀྲ་མི་ཤིས་པའི་ལྟས།།
མི་འབྱུང་ཆེད་དུ་སྐྱབས་གནས་མི་འབོད་པར།།
བར་ཆད་ཅི་བྱུང་ལམ་དུ་འཁྱེར་ནུས་པར།།
གསོལ་བ་འདེབས་པ་ཆོས་འདིའི་ཁྱད་ཆོས་ལགས།།
དེང་སང་ཉོན་མོངས་དྲག་ཏུ་བདོ་བའི་དུས།།
འདུས་བྱས་དགེ་བས་སེམས་རྒྱུད་འདུལ་དཀའ་བས།།
གཅོད་སོགས་སྙིང་བོའི་བསྟན་པར་བརྩོན་དགོས་ཀྱི།།
ཆོས་པའི་གཟུགས་ཅན་ཆོས་མིན་དབང་དུ་འགྲོ།
འོན་ཀྱང་ཌཱ་དྲིལ་འཁྲོལ་དང་དབྱངས་གྱེར་ཚུལ།།
ཤེས་པ་ཙམ་གྱིས་ལམ་དུ་མི་འགྲོ་བས།།
སྔོན་གྱི་དམ་པ་དག་གི་ཞལ་གསུང་རྣམས།།
རང་གི་རྒྱུད་ལ་སྦྱར་ནས་ཉམས་ལེན་དགོས།།
ཡ་མཚན་དམིགས་རིམ་འདོན་གླུ་སྙན་པོ་དང་།།
གཞན་གྱིས་ཡིད་སྨོན་ལ་སོགས་རྐྱེན་བྱས་ནས།།
རྟོགས་པ་མེད་ཀྱང་ཉམས་མཚར་རེ་འབྱུང་ཚེ།།
མི་ཆོས་བླ་མའི་རྫུན་སྨྲའི་ཕྱོགས་ལ་གཟོབ།།
ཨོ་རྒྱན་འཇིགས་མེད་ཆོས་ཀྱི་དབང་པོ་སོགས།།
སྔོན་བྱོན་འཕགས་པའི་སྐྱེ་བོ་དུ་མ་ཡིས།།
གཅོད་པ་རེ་འགས་མི་གཞན་མགོ་བསྐོར་གྱི།།
བྱ་བར་ཟུར་ཟ་མཛད་པ་བསྟན་ལ་ཕན།།
ལག་པར་ཌཱ་རུ་འཛིན་པ་སླ་ན་ཡང་།།
བདག་འཛིན་གཅོད་ལ་དེ་ཙམ་གྱིས་མི་ཆོག།
ངག་ནས་གཅོད་དབྱངས་གྱེར་བ་ཆེས་སླ་ཡང་།།
ཉོན་མོངས་འདྲེ་གདོན་འདུལ་བ་ཤིན་ཏུ་དཀའ།།
ཤེས་རབ་ཕར་ཕྱིན་སྤྱོད་པའི་བྱང་སེམས་བཞིན།།
གཅོད་ཡུལ་ཉམས་སུ་ལེན་ཚེ་ཐེ་ཚོམ་དང་།།
འཇིགས་སྐྲག་རྐྱེན་ངན་སྣ་ཚོགས་འཆར་སྲིད་པས།།
ཆོས་ཉིད་ལྟ་བས་དེ་ཀུན་གཅོད་པར་བྱ།།
ཐར་ལམ་གཅོད་པའི་བདུད་ཅེས་སྒྲ་བོ་ཆེ།།
མགོ་ན་རྭ་དང་མཇུག་ཏུ་རྔ་མ་ཅན།།
འོང་རྒྱུ་མེད་ཀྱང་འཇིག་རྟེན་ཆོས་བརྒྱད་ཀྱི།།
གཟེབ་ཏུ་ཚུད་པས་དེ་ཡི་བྲན་དུ་གྱུར།།
འཇིགས་རུང་གཉན་ཁྲོད་རྒྱུ་བ་ཕྱི་ཡི་གཅོད།།
རང་ལུས་གཟན་དུ་སྒྱུར་བ་ནང་གི་གཅོད།།
སེམས་ཀྱི་རེ་དོགས་གཡུགས་པ་དོན་གྱི་གཅོད།།
དེ་གསུམ་ཉམས་སུ་ལེན་པར་གཅོད་པར་འབོད།།
འཇིག་རྟེན་ཕལ་བའི་བྱ་སྤྱོད་ཡོད་ཚད་དང་།།
དགེ་བར་རློམས་པའི་ལས་ཀ་སྣ་ཚོགས་པ།།
བྱིས་པའི་རྩེད་མོར་མཐོང་བའི་དུས་གཅིག་འོང་།།
དེ་ནི་གཅོད་ཀྱི་ལྟ་དགོངས་རྟོགས་པའི་རྟགས།།
ཀྱེ་མ་སྙིང་བོའི་བསྟན་པ་ནུབ་དུས་འདིར།།
ཕལ་མོ་ཆེ་དག་རྟག་ཆད་འོབས་ལྷུང་ནས།།
སྤྲོས་བྲལ་གནས་ལུགས་ཁ་ནས་སྨྲ་བཞིན་དུ།།
དོན་དུ་དེ་ལ་སྡང་མཁན་ཤིན་ཏུ་མང་།།
ཁ་ནས་གཅོད་རྫོགས་སོགས་ལ་དགའ་ཟེར་ཡང་།།
དོན་དམ་བདེན་པ་ཇི་བཞིན་བཀྲལ་བ་ན།།
བློ་ཡིས་མ་ཤོང་ཉམས་ཆོས་ཉི་ཚེ་བར།།
འདུག་ཅེས་སྐུར་བ་འདེབས་པ་དེང་གི་ལུགས།།
ཀྱི་ཧུད་དངོས་པོ་མཚན་འཛིན་ལྟ་བ་ནི།།
ཆོས་ལྟར་བཅོས་ཀྱང་གསེར་སྒྲོག་དང་མཚུངས་པས།།
ད་ནི་རྣམ་རྟོག་བཟང་ངན་ལས་འདས་པའི།།
རྒྱལ་བའི་དགོངས་པ་ཟབ་མོ་རྟོགས་ལ་རེམས།།
ཚེ་འདི་ཉིད་ལ་གྲོལ་བ་ཐོབ་པའི་མི།།
མ་འོངས་ཅི་བྱུང་སེམས་ཁྲལ་མི་དགོས་པས།།
རང་གནས་སེམས་ཉིད་འོད་གསལ་ཡེ་ཤེས་ཆེ།།
མྱུར་བར་མཇལ་བའི་དམ་བཅའ་ཐུགས་ལ་བཞེས།།
སྣང་བའི་ཆོས་ཀུན་རང་ངོར་སད་པའི་མཐུས།།
བདུད་བཞིའི་དཔུང་ཚོགས་དབྱིངས་སུ་ཞིག་དང་ལྷན།།
ཀ་དག་གཞོན་ནུ་བུམ་སྐུའི་རྒྱལ་ས་རུ།།
འཕོ་མེད་ཆོས་སྐུའི་དཔལ་ལ་སྤྱོད་གྱུར་ཅིག།
ཅེས་ཀུན་མཁྱེན་བླ་མ་རིག་འཛིན་འཇིགས་མེད་གླིང་པ་དང་།
ཚེ་རབས་གཏན་གྱི་མགོན་པོ་ཁྲག་འཐུང་བདུད་འཇོམས་གླིང་པ་སོགས་སྔོན་བྱོན་གོང་མའི་ཟབ་གཏེར་གྱི་བྱིན་རླབས་སྙིང་ལ་ཕོག་ཅིང་།
གཞན་དག་སུ་མ་མགུ་ཡང་ཞེ་བློ་ཅུང་བདེ་བའི་གྱི་ན་བ་པད་མ་ཆོས་ཉིད་རྡོ་རྗེའམ་ཨ་གནམ་ཐུབ་བསྟན་དུ་འབོད་པས།
ཐེ་ལན་ཌིའི་རྒྱལ་ས་བྷེན་ཁོག་གྲོང་ཁྱེར་དུ་བདུད་འཇོམས་ཁྲོས་མ་ཁྲིད་སྐབས་སུ་རང་དང་སྐལ་བ་མཉམ་པ་འགའ་ལ་ཕན་ཕྱིར་སྦྱར་བའོ།།