ལོ: 2021 ལོ།

རིག་སྟོང་འཇམ་དཔལ་གཞོན་ནུའི་འོད་ཟེར་གྱིས།།
གང་ཐུགས་མཛེས་པའི་པད་མོ་གསལ་བྱས་པས།།
སྤོབས་པའི་གཏེར་ཆེན་གྲོལ་བའི་དཔལ་འཆང་བ།།
འཇམ་མགོན་བླ་མ་མི་ཕམ་རྒྱ་མཚོར་འདུད།།

མཐའ་བྲལ་ཆོས་ཉིད་ནམ་མཁའ་ཡི་ཀློང་ན།།
བཟང་ངན་བདེ་སྡུག་རྣམ་རྟོག་ཀུན་ཞིག་ཚེ།།
དོན་དམ་མཆོག་གི་བདུད་རྩི་ལ་རོལ་ནས།།
ས་འདིར་དཀོན་པའི་བདེ་སྐྱིད་ཅིག་ཐོབ་འོང་།།

ཀུན་རྟོག་སྤྲོས་པའི་དྲྭ་བ་ཡོངས་ཟད་ནས།།
ཀུན་གཞིའི་ཆོས་རྣམས་དབྱིངས་སུ་ཞིག་པ་ན།།
ཀུན་ཏུ་བཟང་པོའི་རང་ཞལ་མངོན་གྱུར་པས།།
ཀུན་ལས་རྒྱལ་བའི་དགའ་སྟོན་རོལ་ལ་བསྔགས།།

ཞོགས་པའི་ཉི་འོད་དྲོན་མོ་ས་གཞི་ལ་ཕོག་ཚེ།།
མདང་དགོང་དལ་བུར་ཆགས་པའི་རྩ་རྩེ་ཡི་ཟིལ་ཐིགས།།
ཡིད་དུ་འོང་བའི་བཀྲག་ལྡན་མུ་ཏིག་དང་འདྲ་བ།།
ཡུན་རིང་མི་གནས་ཡལ་བའི་ངང་ཚུལ་འདི་སྐྱོ་བྱུང་།།

ཐམས་ཅད་གཟིགས་པ་དྲང་སྲོང་ཆེན་པོ་དེས།།
དངོས་ཀུན་རྟག་པ་མེད་པར་བསྟན་པ་བཞིན།།
དུས་དང་བསྐལ་བ་སོགས་ཀྱང་མི་བརྟན་པར།།
མྱུར་དུ་འགྱུར་བ་སྲིད་པའི་ཆོས་ཉིད་ལགས།།

བཅོམ་ལྡན་རྒྱལ་བ་འཆི་མེད་ཚེ་ཡི་ལྷ།།
འཇིགས་ཀུན་ལས་སྒྲོལ་ཡིད་བཞིན་འཁོར་ལོ་དང་།།
སྣང་སྲིད་ཟིལ་གནོན་དཔའ་བོ་ཆེན་པོ་སོགས།།
དེང་འདིར་སྨོན་ལམ་འགྲུབ་པའི་དཔང་པོར་གཤེགས།།

མཐའ་བྲལ་ཆོས་དབྱིངས་ཁྱབ་བརྡལ་ནམ་མཁའ་ཡི་ཀློང་ལས།།
ངེས་པ་ལྔ་ལྡན་དགའ་བའི་སྟོན་མོ་ལ་རོལ་བཞིན།།
སྣ་ཚོགས་ཅིར་ཡང་རོལ་བ་འགྲོ་འདུལ་གྱི་དབང་ཕྱུག །
སྐུ་གསུམ་ཀུན་འདུས་འཇིགས་མེད་གླིང་པ་ཉིད་མཁྱེན་ནོ།།

ལྷར་བཅས་འགྲོ་བའི་འདྲེན་པ་ཤཱཀྱའི་གཙོ།།
སྣང་སྲིད་ཟིལ་གནོན་དཔལ་ལྡན་མཚོ་སྐྱེས་རྗེ།།
གདོད་མའི་མགོན་པོ་དྲི་མེད་འོད་ཟེར་སོགས།།
རྩ་བརྒྱུད་བླ་མའི་ཞབས་ལ་གུས་ཕྱག་འཚལ།།

འཛམ་གླིང་ས་ཡི་ཡང་རྩེ་གངས་ལྗོངས་སུ།།
ལུས་ཀྱི་ལྟེ་ཁྲག་དམར་པོ་དོར་ན་ཡང་།།
ལས་རླུང་དྲག་པོས་རྒྱང་རིང་ལ་དེད་ནས།།
གཞན་གྱི་ཡུལ་དུ་མི་ཚེ་བསྐྱལ་དགོས་བྱུང་།།

ཆོས་ཉིད་འདུས་མ་བྱས་པའི་ནམ་མཁའ་རུ།།
རྟོག་ཚོགས་སྤྲིན་གྱི་ཡོལ་བས་མ་སྒྲིབ་པར།།
འོད་གསལ་ཡེ་ཤེས་སྣང་བ་འབུམ་སྤྲོ་བ།།
རྒྱལ་ཡུམ་བཅོམ་ལྡན་འདས་མར་གསོལ་བ་འདེབས།།