མཚན་དཔེའི་རྒྱན་གྱིས་སྤྲས་པའི་གང་སྐུ་གསེར་གྱི་ལྷུན་པོས་འཇིག་རྟེན་མཛེས་པར་བྱས།།
དྲུག་ཅུའི་ཡན་ལག་རྫོགས་པའི་ཚངས་དབྱངས་འགག་པ་མེད་པར་སྲིད་པའི་ཁོངས་ན་སྙན།།
གང་ཐུགས་རྡུལ་དང་བྲལ་བར་ཟབ་ཅིང་རྒྱ་ཆེའི་དོན་ཀུན་མ་ལུས་འགོག་མེད་བཀྲ།
བདག་གི་བླ་མ་བཅོམ་ལྡན་ཤཱཀྱའི་རྒྱལ་པོ་ལྷར་བཅས་འགྲོ་བའི་དཔལ་དུ་བརྗིད།།
ལོ: 2021 ལོ།
རབ་འབྱམས་རྒྱལ་བའི་གསང་བ་གསུམ་གྱི་མཛོད།།
སྤྲུལ་པའི་གར་དུ་རོལ་པའི་དགའ་སྟོན་གྱིས།།
ཞིང་འདིར་ཆོས་ཀྱི་སྣང་བ་སྤྲོ་མཛད་པ།།
བདག་གི་བླ་མ་མཚོ་སྐྱེས་དབང་པོར་བསྔགས།།
སྨྲ་བརྗོད་ལས་འདས་སྤྲོས་པ་བྲལ་བའི་དོན།།
རྣམ་ཐར་གསུམ་ལྡན་ཆོས་ཉིད་མངོན་གྱུར་པ།།
རབ་འབྱམས་རྒྱལ་བ་རྒྱ་མཚོ་བསྐྱེད་པའི་ཡུམ།།
ཤེས་རབ་ཕ་རོལ་ཕྱིན་མར་གསོལ་བ་འདེབས།།
རང་སྣང་རྣམ་དག་གྲུ་འཛིན་ཕོ་བྲང་ནས།།
རབ་མཛེས་ཏཱཾ་ཡིག་འོད་ལས་བཞད་པའི་ལྷ།།
རྒྱལ་བ་ཀུན་ཡུམ་རྗེ་བཙུན་སྒྲོལ་མ་ལ།།
ཇི་སྲིད་བྱང་ཆུབ་བར་དུ་བདག་སྐྱབས་མཆི།།
ཆོས་སྐུ་ཡུམ་ཆེན་རྒྱལ་བ་ཀུན་བཟང་མོའི།།
རང་མདངས་མཚན་དཔེའི་སྒྱུ་འཕྲུལ་མཛེས་སྡུག་ཅན།།
ཆགས་བྲལ་ཆགས་པ་ཆེན་པོའི་སྐུར་ཤར་བ།།
དབྱིངས་ཀྱི་གཙོ་མོ་རྡོ་རྗེ་རྣལ་འབྱོར་མ།།
དོན་དམ་ཟག་བྲལ་ཀློང་ན་བཞེངས་བཞུད་སོགས་ཀྱི་མིང་ཙམ་མི་མངའ་ཡང་།།
གཉིས་འཛིན་གཟུགས་སུ་ཤར་བའི་ཕ་རོལ་རུ་ཏྲའི་དཔུང་ངན་འཇོམས་སླད་དུ།།
རིས་སུ་མ་ཆད་ཀུན་ཁྱབ་སྙིང་རྗེས་འཇིགས་རུང་དཔའ་བོའི་སྐུར་བཞེངས་པ།།
དཀྱིལ་འཁོར་དབང་ཕྱུག་དཔལ་ཆེན་རྡོ་རྗེ་གཞོན་ནུ་བདག་ལ་དགྱེས་པར་གཟིགས།།
འབད་རྩོལ་དྲི་མས་མ་གོས་པར།།
ཡེ་ཤེས་ཚོགས་ཆེན་རྫོགས་པ་ལས།།
འཁོར་བ་མེད་པར་རང་གྲོལ་བ།།
ཀུན་ཏུ་བཟང་པོ་ལ་ཕྱག་འཚལ།།
གཞི་དབྱིངས་ཀ་དག་འཕོ་འགྱུར་མེད་པའི་ལྷུམས།།
ནང་གསལ་ཐིམ་ལ་མ་རྨུགས་བུམ་པའི་སྐུར།།
མངོན་སངས་རྒྱས་པས་སྤང་བླང་ཀུན་ཟད་པ།།
ཡེ་གྲོལ་གདོད་མའི་རྣམ་འདྲེན་ལ་ཕྱག་འཚལ།།
འཇིག་རྟེན་ཟིལ་གནོན་མཚོ་སྐྱེས་རྒྱལ་བའི་བཀའ་ལུང་གནམ་གྱི་ཤེད་མོང་གིས།།
ཁམས་གསུམ་དབང་བསྒྱུར་ཆོས་ཀྱི་རྒྱལ་བོ་འགྲོ་བའི་དེད་དཔོན་དུ་བཀུར་པ།།
ཚད་མེད་མཁྱེན་བརྩེའི་གཏེར་ལ་དབང་འབྱོར་གངས་ལྗོངས་རིག་པ་འཛིན་པའི་གཙོ།།
ཨ་བྷྱ་ལཀྵཾ་ཀ་རའི་མཚན་མཆོག་འཆང་བ་གང་ལ་ལན་མང་བསྔགས།།
སྐྱེ་འགག་མཚན་མའི་དྲྭ་བ་ཡོངས་དག་ཅིང་།།
འཁོར་འདས་ཀུན་ལ་བརྡལ་བའི་དེ་བཞིན་ཉིད།།
མངོན་དུ་མཇལ་ཚེ་འཕགས་པའི་སར་བགྲོད་པ།།
ཨ་མ་སྟོང་ཆེན་རྒྱལ་མོར་གུས་པས་འདུད།།