རྨད་བྱུང་སྡེ་བཞི་དགེ་བཅུའི་ཡོན་ཏན་གྱི།།
འོད་ཟེར་འབུམ་ལྡན་གསེར་གྱི་པྲོག་ཞུ་ཞིག །
རབ་ཡངས་གོ་ལ་ཆེན་པོའི་གཙུག་རྒྱན་དུ།།
མཛེས་པར་བརྒྱན་འདྲའི་གྲོང་ཁྱེར་ཆེན་པོ་བསྔགས།།
མཐོ་རིས་ཞིང་ནས་གནམ་གྱི་སྲས་མོ་དེས།།
འཛམ་གླིང་མི་རྣམས་དགའ་བ་བསྐྱེད་པའི་སླད།།
རིན་ཆེན་ལྷ་རྫས་ས་ལ་གཏོར་བ་ལས།།
བཏུང་བའི་དྭངས་མ་ཇ་ཡི་མེ་ཏོག་བཞད།།
ཤར་མདོ་སྨད་མགོ་ལོག་ཡུལ་ལྗོངས་སུ།།
ཡུལ་སྐྱིད་པོ་སྨར་ཁོག་ལུང་བ་ཞེས།།
སྟེང་ལྷ་ཡུལ་ས་ལ་འཕོས་འདྲ་བ།།
ལས་སྐལ་བ་ཅན་ཚོའི་ཕ་ཡུལ་ཡིན། །
དབྱིངས་ཀྱི་གཙོ་མོ་མཁར་ཆེན་མཚོ་རྒྱལ་དང་།།
ཨ་མ་ལབ་སྒྲོན་འགྲོ་བ་བཟང་མོ་སོགས།།
ཁ་བ་རི་པའི་མཁའ་འགྲོ་མ་རྣམས་ལ།།
མི་ཕྱེད་དད་པས་ཡང་དང་ཡང་དུ་འདུད།།
གངས་ལྗོངས་ཆོས་ཀྱི་དཔའ་བོ་བཞད་པ་ཡི་རྡོ་རྗེ།།
དྲི་མེད་འོད་ཟེར་རྒྱལ་བ་ཀུན་འདུས་ཀྱི་སྤྱི་གཟུགས།།
མཁྱེན་བརྩེའི་འོད་ཟེར་ལ་སོགས་སར་བཞུགས་ཀྱི་དཔའ་བོ།།
སྔོན་བྱོན་གོང་མའི་རླབས་ཆེན་རྣམ་ཐར་ལ་སྙེག་རན།།
རིག་སྟོང་འཇམ་དཔལ་གཞོན་ནུའི་འོད་ཟེར་གྱིས།།
གང་ཐུགས་མཛེས་པའི་པད་མོ་གསལ་བྱས་པས།།
སྤོབས་པའི་གཏེར་ཆེན་གྲོལ་བའི་དཔལ་འཆང་བ།།
འཇམ་མགོན་བླ་མ་མི་ཕམ་རྒྱ་མཚོར་འདུད།།
མཐའ་བྲལ་ཆོས་ཉིད་ནམ་མཁའ་ཡི་ཀློང་ན།།
བཟང་ངན་བདེ་སྡུག་རྣམ་རྟོག་ཀུན་ཞིག་ཚེ།།
དོན་དམ་མཆོག་གི་བདུད་རྩི་ལ་རོལ་ནས།།
ས་འདིར་དཀོན་པའི་བདེ་སྐྱིད་ཅིག་ཐོབ་འོང་།།
ཀུན་རྟོག་སྤྲོས་པའི་དྲྭ་བ་ཡོངས་ཟད་ནས།།
ཀུན་གཞིའི་ཆོས་རྣམས་དབྱིངས་སུ་ཞིག་པ་ན།།
ཀུན་ཏུ་བཟང་པོའི་རང་ཞལ་མངོན་གྱུར་པས།།
ཀུན་ལས་རྒྱལ་བའི་དགའ་སྟོན་རོལ་ལ་བསྔགས།།
ཞོགས་པའི་ཉི་འོད་དྲོན་མོ་ས་གཞི་ལ་ཕོག་ཚེ།།
མདང་དགོང་དལ་བུར་ཆགས་པའི་རྩ་རྩེ་ཡི་ཟིལ་ཐིགས།།
ཡིད་དུ་འོང་བའི་བཀྲག་ལྡན་མུ་ཏིག་དང་འདྲ་བ།།
ཡུན་རིང་མི་གནས་ཡལ་བའི་ངང་ཚུལ་འདི་སྐྱོ་བྱུང་།།
ཐམས་ཅད་གཟིགས་པ་དྲང་སྲོང་ཆེན་པོ་དེས།།
དངོས་ཀུན་རྟག་པ་མེད་པར་བསྟན་པ་བཞིན།།
དུས་དང་བསྐལ་བ་སོགས་ཀྱང་མི་བརྟན་པར།།
མྱུར་དུ་འགྱུར་བ་སྲིད་པའི་ཆོས་ཉིད་ལགས།།