སྐྱེ་འགག་མཚན་མའི་དྲྭ་བ་ཡོངས་དག་ཅིང་།།
འཁོར་འདས་ཀུན་ལ་བརྡལ་བའི་དེ་བཞིན་ཉིད།།
མངོན་དུ་མཇལ་ཚེ་འཕགས་པའི་སར་བགྲོད་པ།།
ཨ་མ་སྟོང་ཆེན་རྒྱལ་མོར་གུས་པས་འདུད།།
འགྲོ་བའི་འདྲེན་པ་ཟས་གཙང་སྲས་པོ་དེས།།
གཞན་གྱིས་ཤིན་ཏུ་རྟོགས་པར་དཀའ་བའི་དོན།།
བརྗོད་དུ་མེད་པ་བརྗོད་པའི་ཚུལ་མཛད་པས།།
འཇིག་རྟེན་འདི་ན་སྨྲ་བའི་དབང་ཕྱུག་གྱུར།།
ཇི་ལྟ་བ་དང་རྒྱུ་འབྲས་ལ་རྨོངས་པའི།།
མ་རིག་རྣམ་པ་གཉིས་ཀྱིས་ཉེར་བསྐྱེད་པ།།
སྣ་ཚོགས་ལྟ་བའི་མཆིང་བུ་སྤུངས་པའི་ཁྲོད།།
ཤཱཀྱའི་རིང་ལུགས་ནོར་བུའི་འོད་མདངས་མཛེས།།
ནམ་མཁའི་གོས་ཅན་དྲང་སྲོང་སེར་སྐྱ་སོགས།།
ཐམས་ཅད་ཤེས་པར་གྲགས་པའི་མཁས་རྣམས་ཀྱི།།
བློ་ཡི་ཁྲོན་པའི་རྫིང་བུར་མ་ཤར་པ།།
སྤྲོས་བྲལ་ནམ་མཁའི་ཀློང་ཆེན་ལ་ཕྱག་འཚལ།།
རྟོག་གེའི་བློ་ཡིས་ཇི་ལྟར་དཔྱད་གྱུར་ཅིང་།།
མཐར་གྱི་གནས་ལུགས་ནམ་ཡང་མ་རྟོགས་པར།།
དང་བོར་རགས་དང་མཐའ་མར་ཕྲ་བ་ཡི།།
རྟག་ཆད་གཡང་དུ་ལྷུང་བ་སྐྱོ་བའི་ཡུལ།།
སེམས་ཀྱིས་བཟོས་པའི་སྒྲ་དང་རྟོག་པ་ཡིས།།
ཐམས་ཅད་འགལ་འདུའི་རང་བཞིན་དུ་མཐོང་བས།།
ཡོད་དང་མེད་པའི་མཐའ་རུ་འཛིན་པ་འདི།།
དམིགས་མེད་ལྟ་བའི་རྒྱལ་པོའི་ཆར་མི་ཉེ།།
རྟགས་དང་རིགས་པའི་དཀའ་བས་བསྒྲུབས་པའི་དོན།།
མི་རྟག་ལ་སོགས་ཆོས་ཉིད་ལ་ཉེ་ཡང་།།
ད་དུང་ཐ་སྙད་བདེན་པའི་རར་ཚུད་པས།།
དོན་དམ་བདེན་པ་ཀུན་ལས་འཕགས་ལ་བསྔགས།།
ཆོས་རྣམས་གང་དུ་གནས་པ་གཞིགས་པའི་ཚེ།།
གཞི་མེད་རྩ་བྲལ་ངང་དུ་བརྡིབས་གྱུར་ནས།།
འདི་ཞེས་གཏད་སོ་ཅི་ཡང་མ་རྙེད་བཞིན།།
ཅང་མེད་བེམ་སྟོང་ཕྱོགས་སུ་མ་ཤོར་མཚར།།
གདོད་མའི་དབྱིངས་སུ་སྤྲོས་པ་ཉེེར་ཞི་ཞིང་།།
གཅིག་དང་ཐ་དད་བྱ་བའི་མིང་མེད་བཞིན།།
སྣ་ཚོགས་སྣང་བ་འཛད་མེད་འཕྲོ་བའི་ཚུལ།།
ཐད་ཀར་རྟོགས་པས་བདེན་པ་མངོན་དུ་གྱུར།།
འཁྲུལ་བྲལ་དབུ་མའི་གཞུང་ལུགས་རླབས་ཆེན་པོར།།
རྒྱས་པར་བཀྲལ་བའི་དཔྱད་འཇོག་སྒོམ་པ་ལ།།
ཡུན་རིང་རྩོལ་བའི་འབྲས་བུ་ཤར་བའི་སྐབས།།
སྤྲོས་མཐའ་ཀུན་བྲལ་དོན་ལ་རེག་པ་སྤྲོ།།
དབང་བོ་ཡང་རབ་ལྡན་པའི་སྐྱེ་བོ་ཡིས།།
ཕྱི་དང་ནང་གི་རྐྱེན་ཀུན་འཛོམས་པའི་མཐུས།།
བློ་ཡི་དཀའ་བ་མང་དུ་མི་སྤྱོད་པར།།
རྟོགས་པ་ཅིག་ཅར་རྙེད་པ་ཡིད་རེ་དགའ།།
ཟབ་མོ་སྟོང་ཉིད་གཏན་ལ་འབེབ་པའི་ཚེ།།
དགག་བྱ་བཀག་ཙམ་ཡིད་ལ་འཆར་རྗེས་སུ།།
འདུས་མ་བྱས་པའི་དོན་དམ་མཐར་ཐུག་པ།།
མྱོང་ཚེ་བསལ་དང་བཞག་བྱ་ཅུང་མ་མཆིས།།
མཐའ་ཡས་གཞུང་ལུགས་སྐར་ཚོགས་ལྟ་བུའི་ནང་།།
དགག་བཞག་སྤོང་གསུམ་རྣམ་བཞག་རྒྱ་ཆེ་ཡང་།།
བློ་ཡི་འཛིན་སྟངས་མཐའ་དག་ཞིག་པ་ན།།
དེ་ལས་གུད་དུ་ལྟ་བ་མེད་པ་རྨད།།
རྒྱལ་བའི་དགོངས་པ་ཤིན་ཏུ་གཏིང་ཟབ་པ།།
ཀླུ་སྒྲུབ་ཞབས་ཀྱིས་རྒྱས་པར་བཀྲལ་བ་ཉིད།།
ཟླ་བ་གྲགས་པས་སླར་དུ་གསལ་མཛད་ཀྱང་།།
ཇི་བཞིན་རྟོགས་པའི་སྐྱེ་བོ་ཉིན་སྐར་བཞིན།།
ཨེ་མ་བདག་གི་སྟོན་པ་ཉི་མའི་གཉེན།།
གྲུབ་མཐའི་མཁན་པོ་གཞན་གྱིས་མ་རྟོགས་པ།།
ཁྱོད་ཀྱིས་སྟོང་བ་ཉིད་ཀྱི་སྒྲ་དབྱངས་ཆེ།།
ས་ཆེན་འདི་རུ་བསྒྲགས་པས་ཟླ་དང་བྲལ།།
སྨྲ་བསམ་བརྗོད་བྲལ་ཐོག་མཐའ་བྲལ་བའི་གཤིས།།
ཆ་ཙམ་གཞལ་ཡང་སྲིད་པ་ཧྲུལ་བྱེད་པ།།
སྦྱིན་སོགས་བསོད་ནམས་མང་དུ་བསགས་པ་ལས།།
དེ་ཉིད་ཡུད་ཙམ་བསྒོམས་པའི་འབྲས་བུ་མཆོག།
ཉིན་བྱེད་འོད་ཀྱིས་སྟོང་བའི་བྲག་ཕུག་ཏུ།།
ཡུན་རིང་གབ་པའི་མུན་པའི་ཕུང་བོ་ནི།།
མར་མེའི་འོད་ཀྱིས་སྐད་ཅིག་སེལ་བ་བཞིན།།
སྤྲོས་བྲལ་མངོན་སུམ་ཤར་ཚེ་བཅིངས་པ་ཞི།།
འཕགས་པའི་ཡུལ་དང་གངས་ལྗོངས་ཞིང་ཁམས་ན།།
དམ་པའི་སྐྱེས་བུ་གསེར་རིའི་ཕྲེང་བ་ཡིས།།
དགོངས་པ་གཅིག་གིས་ཐལ་འགྱུར་བ་ཡི་ལུགས།།
གསུང་དབྱངས་མཐུན་པར་འཆད་ལ་སུ་མི་དགྱེས།།
བསམ་གྱིས་མི་ཁྱབ་རབ་འབྱམས་ཆོས་ཀྱི་དབྱིངས།།
སེམས་ཀྱི་དབུལ་བ་སེལ་བས་ཡིད་བཞིན་ནོར།།
ཉོན་མོངས་ཚ་གདུང་འཇོམས་པའི་དཔག་བསམ་ཤིང་།།
ཟག་བྲལ་དགའ་བདེ་མཐའ་དག་འབྱུང་བའི་གཞི།།
ཐེག་ཆེན་ཆོས་སྒོར་ཞུགས་ཀྱང་བློ་དམན་པས།།
ཁས་ལེན་ཅི་ཡང་མེད་པའི་བཞེད་ཚུལ་ལ།།
རྨོངས་འཁྲུལ་དབང་གིས་ངེས་ཤེས་མ་སྐྱེས་ཚེ།།
ཟབ་མོའི་གནད་ལ་སྡང་བ་ཤིན་ཏུ་མང་།།
སྔོན་དང་ད་ལྟར་བཞུགས་པའི་རྒྱལ་བ་དག།
དོན་འདི་འབའ་ཞིག་གཟིགས་པའི་བསམ་གཏན་ངང་།།
ཤེས་བྱ་གང་གི་ཕྱོགས་སུ་མ་ལྷུང་བས།།
གྲུབ་མཐའི་ཆུ་ཀླུང་མ་ལུས་གཅིག་ཏུ་གཞོལ།།
ལྟ་བ་རབ་ཡངས་མཐའ་བྲལ་ཆེན་པོ་ལས།།
སྒོམ་པ་དམིགས་གཏད་བྲལ་བ་འཁྲུངས་པའི་མཐུས།།
འབྲས་བུ་རེ་དོགས་རྩད་ནས་འབྱིན་དང་ལྷན།།
བློ་བདེ་གུ་ཡངས་མྱོང་བའི་བསྐལ་བཟང་བཀྲ།།
དང་བོར་བློ་ཡི་དངོས་འཛིན་བཅོམ་པའི་སླད།།
རྟགས་ཀྱི་དགག་བྱ་བདེན་གྲུབ་བསལ་དགོས་ཀྱང་།།
རྗེས་སུ་དངོས་དང་དངོས་མེད་གཉིས་ཀ་ལ།།
ཡོངས་སུ་མི་བརྟེན་དབུ་མ་པ་ཡི་ལུགས།།
འགའ་ཞིག་ཚིག་དང་བརྡ་ཆད་ལ་འཁྲིལ་ནས།།
དཔྱད་པ་རྫོགས་སོ་སྙམ་པའི་ཁེངས་སྐྱེ་བ།།
མཛུབ་མོ་ཟླ་བར་འཁྲུལ་བ་ལྟ་བུ་ལས།།
ས་ལམ་ཆོད་ལ་ད་དུང་རྒྱང་ཐག་རིང་།།
ལྟ་བའི་བརྡར་ཤ་ལེགས་པོ་མ་ཆོད་པར།།
ཉི་ཚེའི་ཏིང་ངེ་འཛིན་ལས་བྱུང་བའི་ཉམས།།
མཛེས་པའི་འཇའ་བཞིན་མྱུར་དུ་ཡལ་བས་ན།།
བདེན་པ་མཐོང་ལ་ཐར་པ་འདོད་རྣམས་རེམས།།
རྣམ་རྟོག་གང་ཤར་རྗེས་སུ་མི་འབྲང་བར།།
སེམས་ཀྱི་ཆོས་ཉིད་འོད་གསལ་བ་ཡི་ཐོག།
སྒྲོ་བསྐུར་བཅས་བཅོས་རྩོལ་བ་བཏང་བཞིན་དུ།།
ཡང་དག་ཉིད་ལ་མཉམ་པར་བཞག་པས་གྲོལ།།
འཕགས་ཡུལ་མཁས་དང་གྲུབ་པའི་རྗེས་འཇུག་མཆོག།
རྣལ་འབྱོར་དབང་ཕྱུག་དྲི་མེད་འོད་ཟེར་གྱི།།
རྨ་མེད་ལེགས་བཤད་ཉི་མའི་འོད་ཟེར་ལ།།
བདག་ཡིད་པདྨོ་རང་དབང་མེད་པར་ཕྱོགས།།
ཤིན་ཏུ་རྟོགས་དཀའི་གཞུང་ལུགས་ཉིན་བྱེད་ནི།།
ཕས་རྒོལ་སྤྲིན་གྱི་ཡོལ་བས་བསྒྲིབས་པའི་ཚེ།།
རྒྱ་ཆེན་གཞུང་ལ་ནང་བྱན་ཆུད་པ་ཡི།།
སྨྲ་བའི་སེང་གེའི་གསུང་གི་དྲི་བཞོན་ལྡང་།།
ཨུ་དུམ་ཝ་ར་བཞིན་དུ་རྙེད་དཀའ་བ།།
དལ་འབྱོར་མི་ལུས་རིན་ཆེན་ཐོབ་དུས་འདིར།།
རྣམ་གཡེང་ཀློང་དུ་སྟོང་ཟད་མི་གཏོང་བར།།
ཆོས་ཉིད་དོན་ལ་གཞོལ་བར་དམ་པས་བསྐུལ།།
ཨ་ཧོ་ལས་སྨོན་དག་པའི་རྟེན་འབྲེལ་གྱིས།།
ཐོས་པར་དཀའ་བའི་སྟོང་བ་ཉིད་ཀྱི་ཆོས།།
ཚེ་འདིར་འཕྲད་པའི་དགའ་བའི་རླབས་ཕྲེང་ནི།།
ཡིད་ཀྱི་མཚོ་མོར་འཕྱུར་བས་ཀུན་ཏུ་ཤིས།།
དེ་ལྟར་སྨྲས་ལ་ལེགས་བྱས་གང་མཆིས་པ།།
ད་ནས་བཟུང་སྟེ་བྱང་ཆུབ་མ་ཐོབ་པར།།
མཚན་ཉིད་ལྡན་པའི་བཤེས་དང་མི་འབྲལ་ཞིང་།།
རྣམ་གྲོལ་གྲོང་དུ་བསྐྱོད་པའི་རྒྱུ་རུ་བསྔོ།།
ཞེས་སྨྲ་བསམ་བརྗོད་བྲལ་གྱི་དོན་གྱིས་ཡིད་རབ་ཏུ་འཕྲོག་པའི་སྙོམས་ལས་པ་ཨ་གནམ་ཐུབ་བསྟན་གྱིས་ཨ་རིའི་གྲོང་ཁྱེར་ཆེན་མོ་བྷིར་ཁི་ལས་ནས་སྤྲིངས་པའོ།།